ROXAS CITY – Ginpasalig ni City Mayor Ronnie Dadivas nga mapadayon sini ang maayo nga nangin resulta sang ginpatigayon nga road clearing operation sandig sa memorandum circular sang Department of Interior and Local Government (DILG) kasunod man sang mandu ni Presidente Rodrigo Duterte.
Mahibaluan nga sa ginpatigayon nga inspeksiyon, nakuha sang siyudad ang 92.86% nga rating.
Suno sa alkalde nga wala naangkon sang siyudad ang ini nga kadalag-an kun wala ang kooperasyon sang mga pumuluyo.
Ginpahayag sini nga ang nasambit nga operasyon ang nagresulta sa pagdasig sang dalagan sang trapiko partikular na sa Teodoro Arcenas Trade Center (TATC), Burgos Talipapa sa Burgos Street kag iban pa nga mga kabaranggayan.
Suno pa sa alkalde nga wala man ginpabay-an sang gobyerno ang mga naapektuhan nga negosyante bangud gintinguhaan nga mapangitaan sila sang pwesto agud indi sila madulaan sang palangabuhian.
Hugot man ang pagpasalamat sang alkalde sa bulig sang Roxas City Environmental Sanitation Enforcement Team (RESET), Traffic Management Unit (TMU), City Engineer’s Office, Philippine National Police kag iban pa sa pagsiguro nga mapatuman sang maayo ang road clearing operation.
