ROXAS CITY-Dako ang pagpasalamat ni Roxas City Mayor Dadivas nga gin-aprubahan sang Western Visayas Inter-Agency Task Force ang apelar sini nga 14-day moratorium sa pagpapauli sang mga Locally Stranded Individuals ukon LSI’s sa siyudad.
Sa interview sang Bombo Radyo kay Dadivas ginpahayag sini nga dako ang mabulig sini sa siyudad nga magligwa ang mga ospital kag mga quarantine facilities.
Gindugang pa ni Dadivas nga mahatagan man sini ligwa ang mga frontliners ilabi na ang mga nagatrabaho sa ospital nga makapahuway kag maka-adjust matapos nga asud-asud na ang napagkit nga nagpositibo sa COVID-19 sa probinsya partikular na sa siyudad sang Roxas.
Gin-athag ni Dadivas nga wala ini nagapamalabag sa pagpapauli sang mga LSI’s sa siyudad apang ginahatagan lamang sini sang ligwa ang apelar sang Capiz Medical Society nga “temporary time-out” para sa mga medical frontliners.
Samtang, ginkompirmar man ni Dadivas nga magahatag ini sang kapin P500,000 nga dugang nga pondo para sa Capiz Medical Society.
Suno kay Dadivas nga pagagamiton ini sa mga kinahanglanon sang mga frontliners kalakip na ang dugang nga mga PPE’s nga ila pagagamiton.
Matandaan nga nagpadala sang sulat sa Western Visayas Medical Center si Dadivas nga nag-hinyo sang 14-day moratorium ukon time-out sa pagpapauli sang mga LSI’s sa probinsiya.
