Ang kapaslawan sang executive department kag pamunuan sang Roxas Memorial Provincial Hospital (RMPH) nga pahanugutan nga makatambong ang pila ka mga resource persons kag ang wala pagsumiter sang mga dokumento ang nagtulod sa Sangguniang Panlalawigan nga tapuson na lamang ang Committee Hearing nga nagatalakay sa supplemental request sang ospital.
Ginpahayag ni Board member Jonathan ‘’Sonny’’ Besa nga wala sila sang nakita nga kooperasyon sa ehekutibo kag RMPH sa diin ba-se sa sulat nga gikan sa talatapan sang gobernador, ginadumilian nga magtambong sa ila ginapatawag nga committee hearing ang gina-imbitar nga mga resource persons.
Kasunod sang pagtakup sini ang pagpaguha sang rekomendasyon sang Sangguniang Panlalawigan.
Kalakip sa tatlo ka mga rekomendasyon sang komitiba amo ang resolution nga nagapanawagan sa Commission on Audit central office nga magtukod sang task force kag magpatigayon sang special audit sa gin-alokar nga pondo sng RMPH.
Ginarekomendar man sang komitiba ang pagfile sang kaso sa Office of the Ombudsman Visayas batuk kanday Governor Contreras, Provincial Administrator Edwin Chinel Monares kag RMPH OIC Chief of Hospital Dr. Edmarie Tormon kag pagdeny sa request nga supplemental budget sang RMPH para sa medical and dental supplies, drugs and medicine bangud sa kapaslawan sang ospital nga masumiter ang dokumento nga kinahanglan para ma-account ang P11 million para sa drugs and medicine kag P23.5 million nga medical and dental supplies.
Malawig nga tion ang ginhatag sang sanggunian para makasumiter sang nagakaigo nga dokumento, apang wala nakita ang kooperasyon sa pihak nga kampo.
Ginklaro pa ni Besa nga indi lamang linibo ang ginapangayo nga pondo sang RMPH kundi minilyon gani kinahanglan ini nga busision sang maayo bangud kuwarta ini sang mga pumuluyo.
Wala nalikawan sang opisyal nga matingala bangud kun nakasumiter sang dokumento ang Bailan kag Mambusao district hospital, ano ang rason nga indi ini mahimo sang RMPH.
Indi ayhan suno kay BM Besa nga may ginatago ang tagdumalahan sang ospital?
Ginpanindugan man ni Besa nga wala nagapamulitika ang sanggunian kundi ginahimo lamang nila ang ila obligasyon nga protektahan ang kuwarta sang mga pumuluyo.
Sa katapusan ginklaro sini nga dokumento lamang ang ila kinahanglan kag wala sila nagapang-ipit kabaliktaran sa mga akusasyon nga ginapatuto sa ila sang gobernador.
