ROXAS CITY – Natandog ang balatyagon ni City Councilor Midelo Ocampo sa istorya sang mag-asawa nga Singh nga ginpakigbahin sa Bombo Radyo kun sa diin sa pihak sang ila indi pag-intiendihanay, sila ang nag-ayuhay kag ginpili nga liwat nga mag-upod.
Ini man ang partikular nga rason sang konsehal sa pagpakig-angut sa Bombo Radyo agud magpatigayon sang isa ka ‘dinner date’ sa isa ka sikat nga resort sa siyudad sang Roxas para sa mag-asawa nga Mr. & Mrs. Michael Christian kag Mary Angel Singh.
Suno sa konsehal, naka-relate ini sa duha bangud bilang isa ka mister, madamo man sila sang indi pag-intiendihanay sang iya misis apang nangibabaw ang ila pagpalangga sa isa kag isa.
Naghatag man sang iya nga panugyan si Ocampo kag nagalaom nga mas mapabakod pa sini ang relasyon sang mag-asawa nga Singh.
Ginpahangop ni Ocampo sa mag-asawa nga Singh ang importansiya sang pag-intiendihanay kag pagpatawad nga amo ang yabi sa mapag-on nga relasyon.
