ROXAS CITY – Padayon sa karon ang hugot nga pagbantay sa pila ka mga kabaranggayan sa siyudad sang Roxas nga nakapagkit sang kaso sang coronavirus disease (COVID-19).
Mahibaluan nga nakapagkit sang dugang nga 6 ka mga kaso sang nasambit nga balatian ang siyudad gikan sa Barangay Culasi, Cagay kag Barra.
Sa 6 ka mga kaso, 3 diri ang sa Culasi, 2 sa Cagay kag napagkit ang pinakauna nga kaso sa Barra.
Suno kay Barangay Kagawad Enrico Joseph sang Barangay Culasi, kalakip sa panibag-o nga kaso sang amo nga balatian sa ila barangay ang 50 anyos nga lalaki sang Sitio Sakop kag paryente sang isa ka COVID-19 positive; 68 anyos nga lalaki sang Sitio Sakop kag 60 anyos nga babaye sang Poblacion nga may exposure sa isa ka locally-stranded individual (LSI).
Ginpahayag ni Joseph nga padayon ang ila distribusyon sang food packs sa mga pumuluyo sa mga sitio nga ginlimitahan ang hulag sang residente agud malikawan ang paglapta sang virus.
Suno naman kay Punong Barangay Arturo Aragon sang Barangay Cagay, kalakip sa panibag-o nga kaso sang amo nga balatian sa ila barangay ang 21 anyos nga lalaki kag 26 anyos nga babaye sang Crossing Cagay nga close-contacts sang COVID-19 positive sa amo nga lugar.
Ginpahayag ni Aragon nga kaingud lamang sang balay sang una nga nag-positibo sa amo nga balatian ang nasambit nga mga persona.
Ginpahayag naman ni Punong Barangay Ernie Borreros sang Barangay Barra, ang pinakauna nga napagkit nga kaso sang amo nga balatian sa ila lugar amo ang 70 anyos nga babaye.
Suno diri nga hugot karon nga ginabantayan ang pamilya sang nasambit nga persona kag ginlimitahan man ang pagguwa-sulod sang mga residente agud indi maglapta ang virus.
Mahibaluan nga sa 6 nga panibag-o nga nag-positibo sa amo nga sakit, 4 sa mga ini ang yara na sa Roxas Memorial Provincial Hospital (RMPH) samtang ang 2 naman ang yara sa Hortus Botanicus sa Barangay Milibili.
Sa pangkabug-usan, 7 na ang napagkit nga COVID-19 cases sa Culasi, 9 sa Cagay kag 1 sa Barra.
