Ginsiguro sang Department of Agriculture (DA) nga may bastante nga supply sang abono ang pungsod para sa sektor sang agrikultura, sa pihak sang nagalala nga kinagamo sa tunga sang Israel kag Iran nga posible makaapekto sa shipping sa Gulf region sa diin makit-an ang pungsod Qatar, nga isa sa mga nagapanguna nga supplier sang abono sa pungsod.
Suno kay DA Secretary Francisco Tiu Laurel Jr., may stock ang Pilipinas nga magadugay hasta sa katapusan sang tuig.
Ginsiling man sini nga may mga alternatibo nga supplier sang abonno ang pungsod, kasubong sang Russia kag Brunei Darussalam, rason nga indi ginakahangaw-an nga magkakulangan sang supply.
Samtang, pahayag pa sang tiglikom, wala man ginalauman nga may pagsaka sang presyo sang mga produkto agrikultural, bisan pa man nga posible magka-epekto ang gamay nga pagtaas sang presyo sang gatong.
