Aprubado kag nakapreparar ang Department of Agriculture (DA) sa pangabay sang Department of Social Welfare and Development (DSWD) nga mag-supply sang 490,000 ka sako sang NFA rice nga maga-umpisa sa Hunyo tubtob sa Disyembre.
Katuyuan sini nga pabaskugon ang sabat sang DSWD sa mga kalamidad kag mangin sa ila nga mga feeding programs para sa mga pigado nga komunidad sa sulod sang pungsod.
Nagpasalamat man si Department of Social Welfare and Development (DSWD) Secretary Rex Gatchalian kay Agriculture Secretary Francisco Tiu Laurel Jr. bangud sa madasig nga pag-apruba sang inisyatibo kun sa diin ginhatagan man pagtamod sang tiglikom ang importansya sang alokasyon sang bugas agud masuportaran ang mga pumuluyong Pilipino.
Kasunod sini, nagpalab-ot mag sang pagpasalamat si Tiu Laurel kay Gatchalian bangud isa ka dako nga bulig kun makabig ang amo nga tikang agud mapaguha ang daku nga parte sang natipon nga bugas subong sa mga warehouses sang National Food Authority (NFA).
Mapadasig man ang paghatag sang ligwa sa mga tilipunan sang National Food Authority (NFA) agud makabakal nman sang mga bag-o ang humay nagikan sa mga lokal nga mangunguma sa isa ka patas kag nagakadapat nga presyo. Samtang, isa naman ka dako nga pagbalanse sa karon sa mga buffer stock ang inisyatibo sang duha ka ahensya agud makabulig nga masustiner ang pagpamakal sang mga bag-o nga humay kag masiguro nga magapadayon ang suporta sang gobyerno sa mga lokal nga mangunguma.
