PANITAN, CAPIZ – Daan nga hiligut-anon ang ginalantaw rason sa pagpangpuli sa isa ka senior citizen sa Barangay Tinigban, Panitan,Capiz.
Ang biktima amo si alyas Zaldy, 62- anyos kag residente sang Sitio Ilaya, Barangay Tinigban, Panitan, Capiz.
Ang mga suspek amo sanday alyas Edgar, Alyas Bert kag alyas Eric, yara sa intsakto nga pang-edaron kag lunsay residente man sang nasambit nga lugar.
Sa interview sang Bombo Radyo kay Police Captain Ronald Ton-ogon, Hepe sang Panitan Municipal Police Station, iya ginpahayag nga samtang nagalakat pauli ang biktima, nasugata sini ang suspek nga si alyas Eric sakay ang iya motosiklo, kag ginaalegar nagbuya ang biktima sang indi manami nga tinaga rason nga nagpanaog ang suspek sa iya motor kag gintawag ang mag-utod nga sanday alyas Edgar kag alyas Bert agud atakehon si Zaldy.
Suno kay Ton-ogan ,ginpulihan sang 3 ka mga suspek ang biktima nga nakaangkon sang pilas sa nagkalain-lain nga bahin sang iya lawas bangud sang pagpanglabo kag pagpangbuno sang mga suspek.
Madasig nga gindala sa ospital ang biktima gindeklarar dead on arrival.
Samtang boluntaryo naman nga nagsungka sa kapulisan si alyas Edgar kag nakahunong na sa presohan sa bahin sang Panitan Municipal Police Station kag possible magapangutabang sang kaso nga murder.
Sa subong, padayon ang imbestigasyon kag pagpangita sang mga otoridad sa mga kaupod sang suspek nga nagapabilin nga at atlarge matapos ang ginbuhat nga krimen.
INTERVIEWED BY: BOMBO VINZ DEOCAMPO
