(UPDATE) – Wala na sang kabuhi sang masapwan sang iya himata ang dalaga nga nauna ginreport missing, sa Sitio Matiti, Barangay Najus-an, Mambusao, Capiz.
Sa pagpakig-angut sang Bombo Radyo kay Miguel Luching, utod sang biktima nga si Emmy “Meme” Luching, kapin 1 ka kilometro gid lamang ang kalayuon sang ila balay sa nahamtangan sang bangkay sang dalaga nga nag-utas sang iya kaugalingon nga kabuhi.
Ginkatingala lang sang utod kun sa diin nagkuha sang gamit ang iya manghod sa pag-utas sang kabuhi.
Dugang pa sini nga napadulongan naman nila ang amu nga lugar sa duha nila ka adlaw nga pagpangita, apang wala man nila diri nakit-an ang dalaga.
Nahibaluan nga sang tinalikdan nga adlaw, ginpamangkut si “Meme” sang iya Iloy kun makagradwar ini sa kolehiyo, kag nagsabat ang dalaga nga ‘huo’ apang pagka alas-3 sadto sang hapon, nangindulaan na ang dalaga sa ila balay.
Ginklaro ni Miguel nga wala nila gin-akigan si “Meme” kag mabaton man kun indi ini makakagradwar subong nga tuig bangud bata pa paman ini.
Matandaan nga wala sang nobyo ang biktima kag pagpati sang mga himata sini nga depresyon ang nagtulod sa ila utod sa paghimo sang amu nga bulohaton.
Sa karon, nagapangayo sang pribado nga pagpangasubo ang pamilya kag pangamuyo sa biktima.
Related news: https://m.facebook.com/story.php?story_fbid=5589398557748194&id=294194440601992
