ROXAS CITY – Luyag sang Iloy sang 15-anyos nga babayi nga mapasabat sa layi ang iya bilas nga lalaki nga kumpirmado nga nagpabusong sa iya bata.
Sa interview sang Bombo Radyo kay ‘Cristina’ iloy ni alyas ‘Tata’ sang banwa sang Pontevedra, nga matapos ang isa ka adlaw nga pagpinangita nila sa iya bata, nagtuad ang dalagita nga nagabusong na ini kag gintudlo nga ang amay sini, amu ang bana sang iya bayaw, kun sa diin matuon na sa tapik nga tiyo sang dalagita.
Pagsaysay sang Iloy, nga antes madula si ‘Tata’ Lunes nga adlaw sang nasugata nila ini sa crossing kag nagsiling nga madul-ong sang module sa ila eskwelahan, apang ginkakulba na sini sang nahibaluan nga sa amu man nga adlaw, naglaong man ang suspek nga si Edward Langurayan nga malakat, kag nagdugang ang panagupnop sang Iloy nga updanay ang iya bata kag iya bilas sang pareho na ang mga ini nga wala makapauli sang gab-i kag indi na nila makontak.
Bangud sini, ginpalapta na sa social media nga ‘missing’ ang amu nga dalagita.
Nahibaluan nalang sang nasambit nga Iloy nga apat na ka bulan nga nagabusong si ‘Tata.’
Wala sini matalupangdan ang tiyan sang iya bata bangud masami ini nagasuksok nga maluga kag dalagkuan nga panapton.
Wala man nagdahum-dahom ang Iloy nga may malain nga plano ang iya bilas kay ‘Tata’ bangud nagasalig ini diri.
Nakumpirmar sini nga masami nagapadulong si Langurayan sa ila balay kag ginahatagan sang pagkaon ang nasambit nga dalagita.
Nahibaluan nga masami wala sa ila balay ang ginikanan ni ‘Tata’ bangud naga-trabaho ang mga ini sa kampo.
Sa karon, luyag kuntani pasakaan sang kaso sang Iloy ang suspek apang nalagyo na ini padulong sa Manila, kahapon nga adlaw, Mayo 27.
