ROXAS CITY – Nag-angkon sang menor nga pilas sa natuo nga hawak ang 15-anyos nga babayi matapos nagbato sa ginaalegar duha ka mga hold-upper takna 5:20 sang hapon, Marso 6, sa Barangay Baybay, sini nga syudad.
Ang indi na paghingadlan nga persona, ang isa ka Grade 9 student.
Sandig sa ginbalhag sang biktima sa Roxas Component City Police Station (RCCPS), samtang yara ang biktima sa baybayon kaupod ang iya abyan, sang na-notisyar sang mga ini ang makaduluda nga hulag sang duha ka mga kalalakinhan.
Ba-se sa panaysayon sini, gulpi nga nagpalapit ang mga suspetsado sa ila nahamtangan kag gintutukan sang kutsilyo ginabulubanta 6 ka pulgada ang kahabaon, kadungan sang pagdeklarar nga “hold-up ni hatag samon ang tanan”.
Apang, nagpamalibad ang biktima nga ihatag ang luyag sang mga suspek rason nga pwersahan nga ginkuha sang mga ini ang Iphone XR ginabulubanta nagabalor sa P40,000 nga yara nakatungtong sa paa sang biktima.
Gintinguhaan pa sang biktima nga maagaw liwat ang cellphone apang madinalag-on nga nakuha ini sang mga suspek kag madasig nga nagpalagyo sa indi matumod nga direksyon.
Sa karon, nagapadayon ang imbestigasyon sang kapulisan angut sa insidente.
