ROXAS CITY – Nagpromesa ang pamunuan sang Department of Agrarian Reform sa Capiz nga magahimo sila sang tikang agud ma-lift ang injunction order nga ginpapanaug sang korte sa kontrobersyal nga duta nga ginapakigbato sang mga mangunguma nga may ginauyatan nga Certificate of Land Ownership Award ukon CLOA gikan sa pamilya Tan sa Barangay Culilang, banwa sang President Roxas, Capiz.
Suno kay Atty. Carlette Caldeo-Pretta, legal officer sang DAR sa Capiz nga limitado lamang ang ila nga mahimo nga tikang bangud sa injunction sang korte nga temporaryo nga nagapauntat nga mahatag sa mga mangunguma ang ginapakigbato nga duta sa idalum sang Comprehensive Agrarian Reform Program ukon CARP.
Matandaan nga binaril-patay ang isa ka mangunguma samtang apat ang pilason makaligad nga luthangon sang mga tinawo ni Kapitan Ferdinand Bacanto nga amo ang administrador sang duta sang pamilya Tan.
