ROXAS CITY – Arestado ang dating barangay tanod ng Barangay Punta Tabuc, Roxas City matapos makunan ng mga iligal na droga ng mga kasapi ng Roxas City PNP na nagsilbe ng search warrant sa bahay nito sa Sityo Urban, Barangay Punta Tabuc, nitong lungsod.
Kinilala ang subject ng search warrant na si Danilo Castillo alyas Dodoy Mudlat 63-anyos.
Sa panayam ng Bombo Radyo Roxas kay Superintendent Dante Tayco, chief of police ng Roxas City PNP, sinabi nito na matagal ang kanilang pagmonitor kay Castillo na itinuro ng mga naaresto sa isinagawang anti-drug operations na nagtutulak ng iligal na droga sa kanila.
Narekober sa bahay ni Castillo ang 12 sachet ng pinaniniwalaang shabu, 3 cellphone, limang bala ng baril, wallet at drug paraphernalia.
Samantala ayun naman kay Castillo na planted lamang ang lahat ng ebedensiya na sinasabi ng mga pulis na nakuha nila sa bahay nito.
Inireklamo rin ng dating tanod ang pagkawala ng kanyang pera na nagkakahalaga ng P31,000 na mula sa pinagbentahan nila ng tricycle na gagamitin sa binyag ng kanyang apo.
Ayun dito na inilagay niya ang pera kasama ang passbook sa ilalim ng kama, ngunit nawala ng pumasok ang mga pulis sa kanyang silid.
