Ginpaguha na sang Department of Budget and Management (DBM) ang P3.6 bilyon nga pondo para sa pagpatakod sang kuryente sa rural areas.
Ini ang kasunod sa handom ni Presidente Ferdinand Marcos Jr. nga malab-ot ang total electrification sa bug-os nga pungsod antes magtakop ang iya nga termino sa 2028.
Sa isa ka statement, ginsiling sang DBM nga gin-aprubahan na ni Budget Secretary Amenah Pangandaman ang Special Allotment Release order (SARO) para sa 2025 Strategized Rural Electrification and Operational Reliability for Electric Cooperatives sa National Electrification Administration (NEA).
Sentro sang nasambit nga kantidad ang pagpatakod sang kuryente sa 1,752 sitios kag lima ka barangay sa idalom sang 2025 subsidy.
Dugang nga P68.839 million man ang gin-alokar para sa rehabilitasyon sang lima ka barangay nga anay ginaserbisyuhan sang off-grid solutions pamaagi sang Barangay Line Enhancement Program.
Magluwas diri, kabilugan P120 million ang gamiton para sa pagbakal kag pagpanagtag sang 4,000 units sang Solar Photovoltaic Mainstreaming agud mahatagan sang elektrisidad ang mga komunidad nga wala sang kuryente.
Suno sa DBM, yara sa 9,622 target sitios ang wala pa sang kuryente nga plano nga pondohan sang pungsodnon nga pondo tubtob 2028.
