Naglab-ot na sa 35 ang death toll sang Binaliw Landfill landslide sa Cebu City matapos narekober ang dugang nga tatlo ka bangkay sang Sabado.
Suno kay Cebu City Councilor Dave Tumulak, duha ka bangkay ang narekober kahapn nga adlaw.
Apang, wala pa matumod ang identity sang tatlo ka mga biktima.
May isa pa ka tawo nga ginreport nga missing, kag padayon pa ang search and retrieval operations sa lugar.
Matandaan nga natabo ang trahedya sang Enero 8, sa diin ginabulubanta 20 ka panalgan sang basura ang narumpag sa nasambit nga landfill rason nga naglubong ang pila ka mga trabahador sa lugar.
Bilang sabat, gindeklarar sang Sangguniang Panlungsod sang Cebu ang Enero 16 bilang isa ka adlaw sang pagpangasubo para sa mga biktima kag ginpaidalum ang syudad sa isa ka state of calamity, nga nagahatag sang otoridad sa pagpaguwa sang P30 milyon nga quick response fund para sa paggasto sang mga serbisyo may kaangtanan sa paghaboy sang basura.
Suno sa Prime Integrated Waste Solutions Inc., operator sang Binaliw landfill, nga base sa inisyal nga assessment sang mga opisyales kag eksperto sang syudad, ang pagkarumpag ang posible tuga sang gintingob nga epekto sang magnitude 6.9 nga linog sang Setyembre 2025, ang mga aftershocks sini, kag ang mabaskog nga pag-ulan nga gintuga sang Bagyong Tino.
Dugang pa sang kompaniya, nakahatag ini sang bulig pinansyal kag suporta sa psychosocial sa pamilya sang mga apektado nga empleyado, kag nasakop man sini ang gasto sa pagpabulong sang mga napilasan, subong man ang gasto sa haya kag lubong sang mga biktima nga napatay.
