Naglab-ot na sa masobra 80 ka mga tawo ang napatay sa pagbayluhanay sang missiles kag airstrikes sa tunga sang Israel kag Iran.
Suno sa mga otoridad sang Israel, tatlo ka tawo ang napatay sa Israel kag 19 ang napilasan sa serye sang Iranian missiles.
Duha ka tawo ang napatay kag 19 ang napilasan sa isa ka Iranian missile attack nga nag-igo malapit sa mga puluy-an sa Rishon Lezion, nabagatnan sang Tel Aviv.
Ang ikatatlo nga indibidwal ang napatay matapos naigo sang isa ka pidaso sang Iranian missile sa una nga balod sang overnight missile strikes. Ang babaye nga biktima gindeklarar nga patay sa syudad sang Ramat Gan, sa sidlangan sang Tel Aviv.
Ginreport sang Iran nga 78 ka tawo ang napatay sa mga pag-atake sang Israel kag 320 ang napilasan, kalabanan sa ila mga sibilyan.
Samtang padayon naman ang pagpangita sa mga residente nga posible na-trap sa mga buildings malapit sa residential areas sang Rishon Lezion nga naigo sang Iranian missile strikes.
Suno sa National emergency response agency Magen David Adom (MDA), pila ka mga buildings ang tuman nga nahalitan sang nag-abot sa lugar samtang ang pila sa mga pilason ang na-trap sa narumpag nga buildings kag ang iban naman ang nakit-an nga nagalakat nga may mga pilas.
Una diri, liwat nga nagdabdab ang tensyon sa tunga sang Iran kag Israel matapos ang hinali nga pag-atake sang Israel sang Biyernes sa nuclear kag military facilities sang Iran nga nagtulod sa pila ka mga nagapanguna nga lider sang pungsod nga nagtulod sa pagbalos paagi sa pag-atake sang missile sa Israel.
