Ginpakigbahin sang Department of Agriculture-Capiz ang kahalitan nga ginbilin sang asud-asud nga bagyo nga nag-agi sa probinsya sang Capiz.
Sa interview sang Bombo Radyo kay Raoul Perez, Acting Provincial Agriculturist sang Office of the Provincial Agriculturist of Capiz, iya ginpahayag nga may yara sang daku nga kahalitan sa ulumhan kag kamaisan bangud sang mabaskog nga pag-ulan nga nagtuga sang pagbaha.
Suno kay Perez, sa bahin sang ulumhan, may yara sang totally damage nga naglab-ot sa 1,966.8 hectares nga nagabalor P556.75 million kag partially damage nga naglab-ot sa 1,410 hectares nga may 2,504 tanan ka mga mangunguma.
Samtang, sa bahin sang kamaisan, may yara sang kahalitan nga naglab-ot sa 48.35 hectares kag mga high quality crops nga naglab-ot sa 45.98 hectares.
Pahayag pa niya, ang provincial government ang nagatan-ay sang crop insurance agud makabulig sa mga mangunguma sa panahaon sang kalamidad.
Ginpasiguro man sang natungdan nga nagadihon sila sang mga pamaagi agud nga gilayon nga mabuligan ang mga naapektuhan sang asud-asud nga kalamidad nga nag-agi sa probinsya.
