Ginabantayan sang Department of Agriculture (DA) ang pagbag-o sang presyo sang bugas kag bombay sa merkado sa tunga sang ginreport nga mataas nga retail prices, apisar nga nagapabilin nga manubo ang farmgate price, partikular na bombay.
Suno kay Department of Agriculture Secretary Francisco Tiu Laurel Jr., gina-address ini sang DA agud mapabilin nga barato ang pagkaon kag masiguro nga makabaton sang patas nga kita ang mga mangunguma.
Pahayag pa sang market analyst, nagsaka ang presyo sang bugas kag bombay bangud sa atrasado nga pag-abot sang imported supplies.
Ginalauman man sang DA nga magabalik sa normal ang presyo sang bugas sa tunga-tunga sang Marso kadungan sang harvest season kag pag-abot sang mga imports.
Ginapasangkad man sang DA ang pagpatuman sang Benteng Bigas, Meron Na nga programa sa mga dalagko nga syudad.
Samtang, ginatun-an man sang ahensya ang mga tikang agud mapataas ang farmgate price sang bombay antes ang peak harvest sa bulan sang Marso kag Abril.
