ROXAS CITY, CAPIZ – Ginpasalamatan sang Department of Education – Capiz ang mga nagsuporta sa Brigada Eskwela nga ginsuguran kahapon, Hunyo 9.
Sa interview sang Bombo Radyo kay Schools Division Superintendent Dr. Roel Bermejo, iya ginkalipay ang ginpakita nga suporta sang mga ahensiya sang gobyerno, stakeholders kag mga ginikanan sa Brigada Eskwela nga dululungan nga ginpatigayon ang Kick-Off activity kahapon sa 471 nga buluthuan sa probinsya.
Suno kay Dr. Bermejo, pinaagi sa Brigada Eskwela masiguro nga ang tagsa ka mga buluthuan makasugod gilayon sa pag-conduct sang klase sa mga estudyante pag-abot sang Hunyo 16.
Ang tema sang Brigada Eskwela subong nga tuig amo ang “Sama-sama para sa Bayang Bumabasa,” sa diin katuyuan sini amo nga mag-isa ang tanan nga stakeholders sa paghanda sa pagbukas sang klase kag ma-improve ang literacy sang Filipino learners.
