Naglab-ot na sa masobra ₱116 million ang bulig nga ginhatag sang Department of Social Welfare and Development (DSWD) sa mga pumuluyo nga apektado sang ulan kag baha dala sang Bagyong Tino.
Kalakip sa sini nga mga basic aid amo ang family food packs nga ginpanagtag sa mga biktima, ilabi na sa mga nadulaan sang puluy-an nga pamilya.
Sa pinakaulihi nga datus sang DSWD, naglab-ot na sa 191,526 ka boxes sang family food packs (FFPs) ang ginpadala bilang sabat sa pangabay sang bulig sang mga lokal nga gobyerno sa siyam ka apektado nga rehiyon.
Nagpadala man sila sang 1,961 ka kahon sang ready-to-eat food (RTEF) magluwas pa sa mga non-food items, modular tents, kag sleeping kits.
Ginpahayag man sang ahensya nga ginapreparar na nila ang emergency cash assistance para sa mga pamilya nga apektado sang kalamidad.
Padayon ang trabaho sang DSWD bangud masobra sa 600,000 ka pamilya ukon duha ka milyon ka indibidwal ang apektado sang Bagyo Tino.
Sa sini nga numero, 133,000 ka mga pamilya ang nagatinir sa masobra 5,000 ka mga evacuation centers.
