Ginpasalig sang Department of Education (DepEd) sa Western Visayas nga ila sundon kag ipatuman ang mandu ni Presidente Ferdinand “Bongbong” Marcos Jr nga gilayon nga aksyonan ang mga kaso sang kalakasan sa mga buluthuan.
Sa interview sang Bombo Radyo Roxas kay Dr. Roel Bermejo, School Division Superintendent sang Capiz, iya ginpahayag nga handa ang iya talatapan nga magkoordinar sa iban pa nga ahensya sang gobyerno agud magpatigayon sang maid-id nga imbestigasyon kag magpatuman sang mas hugot nga seguridad sa mga buluthuan.
Suno kay Bermejo, ginmanduan sang Presidente ang DepEd, Department of the Interior and Local Government (DILG), kag Philippine National Police (PNP) nga magkooperar sa pag-imbestigar sang mga insidente kag sa pagrepaso sang karon nga mga guidelines sa seguridad sang eskwelahan.
Gintugyanan man ang Department of Social Welfare and Development (DSWD) nga repasuhon ang pagpatuman sang mga polisiya sa pag-amlig sa kabataan sa bug-os nga pungsod, nga may pokus sa pagpabaskog sang mga programa nga nagasabat sa ikaayong-lawas sang paminsaron kag kaayuhan sang mga estudyante.
Ang mando ang kasunod sang asud-asod nga mga insidente sang kalakasan sa mga eskwelahan sa pila ka bahin sang Luzon kag Mindanao sining nagligad nga semana sa diin ang iban sini ang nagresulta sa malubha nga mga pilas kag bisan kamatayon.
