ROXAS CITY-Nagapadayon sa karon ang pagbaton sang Department of the Interior and Local Government (DILG) sa mga aplikante nga luyag mangin COVID-19 contact tracers sa probinsiya sang Capiz.
Mahibaluan nga ang mga nauna na nga nabaton ang nakapirma na sang ila nga tagsa ka mga kontrata bilang opisyal na nga mga contact tracers sang mga na close contact sang mga nagpositibo sa COVID-19.
Sa impormasyon nga nakuha sang Bombo Radyo nga tubtob na gid lamang sa Oktubre ang pagbaton sang mga aplikante para sa COVID-19 contact tracers.
Suno kay Mr. Joeffry Espiritu, Development Management Officer IV sang Department of Health Region 6 nga wala pa ini sila sang ideya kun pila ka mga contact tracers ang igapahamtang sa tagsa ka mga kabanwahanan apang sandig sa DILG, nagabasi ini sa kadamuon sang mga nagpositibo sa COVID-19 sa isa ka banwa.
Suno kay Espiritu nga ang nabaton na nga mgacontact tracers ang wala pa napaidalom sang paghanas, apang posible nga ang DOH amo ang magahanas sa ila sa madasun nga mga inadlaw.
Ginpahayag sini nga masobra 200 pa lamang ang nabaton nga mga contact tracers kag nagapadayon pa ang pagbaton sang ahensiya agud malab-ot ang target nga 400 ka mga contact tracers.
Mahibaluan nga magatrabaho sa sulod sang tatlo ka bulan ang mga nabaton nga mga contact tracers.
