ROXAS CITY, CAPIZ – Liwat nga nagpanugyan ang Department of Health Western Visayas Center for Health Development (DOH WV CHD) sa publiko nahanunungod sa mga ginapatuman nga safety guidelines matapos ang kumpirmasyon sang mga kaso sang Mpox sa pungsod.
Ang Mpox nga anay kilala bilang Monkeypox ang isa makalalaton nga balatian nga tuga sang Monkeypox virus. May ara ini sang duha ka nagapanguna nga sahi ukon clade: ang Clade I, nga naangut sa mas malala nga sintomas kag mas mataas ang tyansa sa kamatayon, kag ang Clade II nga may severe symptoms.
Mahimo mapasa ang sakit sa duha ka paagi:
Direct transmission – kasubong sang pisikal nga kontak sa panit ukon pilas nga may sakit, paghaklo sang droplets gikan sa pag-ubo, pagpangatsi, ukon sa pagpakig-istorya, kag pinaagi sa intimate contact kasubong sang paghalokay, kup-anay, ukon pagpakighilawas.
Indirect transmission, kasubong sang pag-uyat sa mga kontaminado nga gamit kaangay sang tuwalya, habol, bayo, kag iban pa nga personal nga gamit sang tawo nga infected.
Kalakip sa mga kinaandan nga sintomas sang Mpox ang pag-angkon sang rashes ukon pilas sa panit, lagnat, pagpalanakit sang ulo, likod, kag kaunuran, pagpalangluya, kag pagbanog sang lymph nodes. Ang mga sintomas mahimo nga magdugay sang duha tubtob apat ka semana.
Bilang sabat, ginganyat sang Department of Health Western Visayas Center for Health Development (DOH WV CHD) ang publiko nga sundon ang mga masunod nga preventive measures:
1. Likawan ang skin-to-skin contact, ilabi na sa magutok nga lugar ukon sa mga tawo nga may pinasahi nga rashes.
2. Indi mag-share sang personal nga gamit kasubong sang tuwalya kag habol.
3. Masami nga maghugas ukon mag-sanitize sang kamot, ilabi na antes magkaon ukon mag-uyat sa guya.
4. Mangin updated sa mga report angut sa Mpox sa inyo nga lugar.
5. Kun makaeksperyensya sang sintomas ukon posible nga na-expose, mag-self-isolate kag gilayon nga magkonsulta sa healthcare provider.
Ginpanugyanan man ang mga opisina, establisyemento, kag mga pampubliko nga lugar nga ipatuman ang kapareho nga mga tikang para sa katinlo kasubong sang paghatag sang sanitizer, regular nga pagpanglimpyo sang mga gamit kag lugar, kag pag-ilis sang mga linen kag tuwalya pagkatapos sang kada gamit.
Importante nga mahibaluan nga makalalaton ang Mpox sa tion nga magguwa ang mga sintomas kasubong sang rashes, lagnat, kag pagbanog sang lymph nodes. Bangud sini, ginhatagan pagtamod sang DOH WV CHD nga importante ang timprano nga pagkonsulta sa doktor agud maprotektahan ang kaugalingon kag ang iban nga tawo.
Tinutuyo sang ahensya nga mapabilin nga luwas ang Western Visayas batuk sa Mpox, sa bulig sang kooperasyon kag disiplina sang kada isa.
