Posible nga may iban pa nga mga personalidad, magluwas sa isa ka kilala nga ‘celebrity’, nga may kahilabtanan sa pagkadula sang mga manugbulang suno sa Department of Justice (DOJ).
Ginpahayag ni Justice Secretary Jesus Crispin Remulla nga posible may iban pa nga mga kilala nga tawo nga gin-imbestigaran parte sa mga nagakaladula nga mga manugbulang.
Apang, naglikaw ini sa pagkompirmar kun isa ka sikat nga babayi nga artista ang kasabwat sang ginatawag nga ‘mastermind’ sa kaso. Ginsiling sini nga indi pa siya maghatag sang pahayag ukon kumpirmasyon tubtob nga maberipika pa ang mga impormasyon.
Gani, ginpahayag sini nga may ara pa sang mas madamo nga mga tawo nga posible nga naulamid sa kaso kag padayon pa ang ila imbestigasyon. Ginpabugal sini nga may mga bag-o na nga developments sa ila imbestigasyon kag padayon nila nga gina-eksamen ang mga impormasyon nga ila nakuha. Nagpangayo man ini sang dugang nga pasensya kag oras agud matutokan ang hugot nga kamatuoran.
Sa pihak nga bahin, ginpamatud-an man ni Remulla nga ang DOJ nakig-koordinar na sa gobyerno sang Japan agud magpangayo sang bulig sa pagsolbar sang kaso. Gusto sang ahensya nga mapamatud-an ang mga pahayag sang testigo nga si alyas ‘Totoy’, nga naghambal nga pagkatapos nga mapatay, ginlubong ang mga nagkaaladula nga mga manugbulang sa bahin sang Taal, Lake.
Ginpahayag man ni Remulla nga ang DOJ naga-koordinar sa Philippine Navy, Philippine Coast Guard, kag Department of Environment and Natural Resources agud mapadasig ang imbestigasyon.
Apang, sang ginpamangkot ini parte sa target date sang operasyon, wala ini nakahatag sang eksakto nga petsa. Sa subong, wala pa gihapon nasolbar kung diin na ang mga nagkaladula nga mga manugbulang, apang ginpasiguro sang DOJ nga ila pagahimoon ang tanan agud malab-ot ang hustisya para sa mga biktima.
