ROXAS CITY – Wala pa sang may nabaton nga apelar ang Department of Labor and Employment (DOLE) Region 6 nagikan sa Philippine Chambers of Commerce natuhoy sa ginpaguwa nga order nga wage hike increase sa Western Visayas.
Ini ang ginkumpirmar ni Atty. Sixto Rodriguez, Regional Director sang DOLE-6 sang mainterview sang Bombo Radyo.
Suno kay Rodriguez may yara na sang nagfile sang petisyon antes ipatigayon ang hearing sa pagpataas sang sweldo sa rehiyon, kun sa din ini ang gintun-an kag ginpamatian sang board antes ipapanaug ang wage order.
Apang, ginklaro sini nga lain ang petisyon sa apelar.
Dugang pa ni Rodriguez, igapatuman ang wage order nga ginpapanaug sang Regional Tripartite Wages and Productivity Boards (RTWPB) sa Hunyo 5, 2022, apisar may yara sang apelar sa nasambit nga mandu.
Pananglitan may yara sang apelar sa wage increase ini ang igaduso sa National Board.
