Nagbisita sa Roxas City ang mga katapo sang DPWH Office of the Undersecretary for Special Concerns kag iban pa nga mga opisyal sang ahensya agud magkoordinar sa City Government parte sa pagpatuman sang Oplan Kontra Baha nga proyekto sa syudad.
Sa pagbisita sini, ginkuha ang kahigayunan agud ipaabot sa DPWH ang mga concern kag plano sang City Government para masolbar ang problema sa pagbaha nga padayon nga ginaatubang sang Roxas City.
Lakip sa mga gintalakay ang pagpatuman sang DPWH Drainage Project nga magasugpon sa ginapaobra nga drainage project sang Roxas City Government sa Tiza.
Ginapaabot nga paagi sa pagkoordinar sang duha ka proyekto, mas mapaayo ang pag-agos sang tubig kag mabuhinan ang posibilidad sang pagbaha sa mga apektado nga lugar.
Ginakalakipan man sang plano ang pagpatigayon sang dredging sa Panay River agud mapalapad kag mapalawig ang kapasidad sini sa pagpasulod kag pag-agos sang tubig, ilabi na sa tion sang mabaskog nga ulan.
Gindescribe sang City government ang pagkoordinar upod sa DPWH bilang importante nga tikang sa pagpatuman sang mas malawig kag epektibo nga solusyon sa problema sa baha sa Roxas City.
Pinaagi sa padayon nga kolaborasyon sang City Government kag DPWH, ginapaabot nga mapalig-on pa ang mga proyekto kag tikang para sa mas luwas, mas preparado, kag mas baha-resilient nga Roxas City.
