ROXAS CITY – Magapabilin bilang Officer-in-Charge (OIC) sang Capiz Provincial Health Office si Dr. Leah Del Rosario.
Ini ang panindugan ni Capiz Governor Esteban Evan ‘Nonoy’ Contreras sang mainterview sang Bombo Radyo.
Ini ang sa pihak sang panawagan sang League of the Municipalities of the Philippines (LMP) Capiz Chapter nga pahalinon ang amo nga opisyal.
Suno kay Contreras nga para sa iya, wala sang rason agud patal-usan sini si Del Rosario bangud ini man nga nakit-an ang trabaho sini.
Ginlaragway pa sini si Del Rosario bilang ‘dedicated kag passionate’ sa iya nga trabaho.
Nagapati ang gobernador nga sa panahon sa karon sang krisis tuga sang coronavirus disease (COVID-19), indi na dapat magbinasulay sa baylo magbuligay na lamang ang tanan agud malampuwasan ang pandemiya.
Mahibaluan nga kasunod sang apelar sang LMP-Capiz Chapter, nag-file sang leave ni Del Rosario kag temporaryo lamang ini nga gintal-usan bilang OIC ni Dr. Evelyn Bolido nga amo ang Medical Specialist IV kag hepe sang Technical Services Division sang nasambit nga talatapan.
Apang nagpanindugan ang gobernador nga sa pagbalik sa trabaho ni Del Rosario, siya gihapon ang OIC sang talatapan tubtob sa makabalik si Dr. Samuel Delfin.
