ROXAS CITY – Ginhilway na sa karsel sang Dumarao MPS ang driver sang truck nga nakabunggo sang motorsiklo nga gintunaan sang kamatayon sang tatlo ka menor de edad sa National Highway Barangay Poblacion Ilaya banwa sang Dumarao.
Ang tatlo ka mga biktima ang nagapang-edaron sang 12-anyos tubtob 13-anyos nga lunsay mga residente sang Barangay Janguslob, sang nasambit nga banwa samtang ang driver ang ginkilala kay Jeonec Osoya, 33-anyos nga residente sang Bago City, Negros Occidental.
Matandaan, nga nabungguan sang salakyan ang ginasundan sini nga motorsiklo nga ginasakyan sang 3 ka menor de edad sang hinali ini nagliko pawala.
Ginpahayag nga ginyudyud pa sang salakyan ang mga biktima kabangdanan nga nag-angkon ang mga ini sang patal nga kapilasan sa ulo.
Gilayon naman nga ginpadangat sang mga responders sa magkatuhay nga ospital ang mga biktima apang lunsay ang mga ini nga ginbawian sang kabuhi.
Samtang, nag-settle na ang magtimbang nga bahin kag pagasabton sang driver kag sang kumpanya nga ginatrabahuan sini ang galastuson sa pagpalubong sang mga biktima.
