ROXAS CITY, CAPIZ – Nagpabutyag sang kalain sang buot ang isa ka driver sang Ceres bus matapos nga ticketan kun tani sang mga personnel sang Public Order and Safety Unit (POSU) sa banwa sang Sigma bangud sa ginapahayag nga overspeeding.
Sa interview sang Bombo Radyo kay Benjie Barnizo, Ceres bus driver nga nagabyahe Tapaz-Roxas City vice versa, iya ginpahayag nga ginparahan siya sang POSU personnel sang paglabay sini sa Sigma kag ginhambalan nga may sala siya nga overspeeding. Apang nagdepensa ini nga wala siya naglapas sa speed limit bangud 80 kph lang ang iya dalagan base sa gin-allow nga limit sang ila kompanya kag sang Land Transportation Franchising and Regulatory Board (LTFRB).
Nahibaluan nga sang gintsekyar sang POSU, 72 kph ang iya speed sa amo nga tion kag base sa lokal nga ordinansa sang Sigma, dapat 50 kph lang ang maximum nga speed sang mga bus sa ila lugar.
Suno kay Barnizo nga nagpangayo man siya sang pasaylo kag ginpahayag nga wala siya nakahibalo sa amo nga ordinansa bangud nasanay ini sa ruta sang Antique kag bag-o pa lang ini nga nagbalik-byahe sa ruta nga Roxas-Tapaz kag wala niya man natalupangdan ang mga signages sa karsada sa nasambit nga banwa.
Dugang pa sang natungdan, nagpangabay ini sa POSU personnel nga warning lang anay ang ihatag bangud first offense niya ini kag masakit sa iya bulsa ang multa nga P1,000, ilabi na nga P600 lang ang iya adlaw-adlaw nga kita.
Panawagan sini nga hatagan man kun tani sang tyansa ang mga wala nakahibalo sang ordinansa sa amo nga banwa.
– Interviewed by: Bombo Sunnie Mae Batencila
