Drug den sa Roxas City, ginsalakay sang PDEA, 5 ka persona arestado
Roxas City – Ginsalakay sang Philippine Drug Enforcement Agency ukon PDEA-6 ang isa ka drug den sa Golden Village, New Road, Barangay Banica, sining syudad
Naaresto sa operasyon ang lima ka persona nga ginkilala nga sanday Richard Manalon, 29-anyos sang Barangay Tanque; Mark Dela Cruz, 21-anyos, John Michael Dela Cruz, 32-anyos, Olime Dela Cruz, 35-anyos lunsay mga residente sang New Road, Banica kag Robert Barredo, 31-anyos, residente sang Barangay Linateran, Panay.
Naaktuhan pa sang PDEA ang iban nga mga arestado nga nagapatigayon sang pot session sa balay nga ginapanag-iyahan ni Tony Dela Cruz nga amo ang mayor nga subject sang operasyon, apang wala ito sa lugar sang patigayunon ang operasyon.
Sa interview ssng Bombo Radyo Roxas kay PDEA – Capiz provincial officer Ramir Batuigas, ginpahayag sini nga bag-o lamang sila nag-abot sa Roxas City sang makabaton sila sang impormasyon rason nga nagpatigayon na sila sang operasyon agud mauntat ang iligal nga aktibidad
Narekober sa mga arestado ang 20 ka sachets sang ilegal nga druga nga nagalab-ot sa P102,000, mga drug paraphernalia kag marked money.
Natalana nga pasakaan sang paglapas sa RA 9165 ukon Comprehensive Dangerous Drugs Act of 2002 ang lima ka mga arestado nga karon yara sa kostodiya sang PDEA-6.
