ROXAS CITY – Nagapadayon sa karon ang Department of Social Welfare and Development (DSWD) sa pagpanghatag sang cash grant ukon ayuda sa dugang nga mga benepisyaryo ukon ginakabig nga left-outs sa emergency subsidy nga Social Amelioration Program (SAP).
Ini ang ginpahayag ni DSWD-Regional Office 6 Public Information Officer May Rago-Castillo sang mainterview sang Bombo Radyo.
Suno diri nga kaupod sang ahensiya sa pagpanghatag sang amo nga ayuda ang mga local government units (LGU’s), Department of Interior and Local Government (DILG), kag mga katapo sang Armed Forces of the Philippines kag Philippine National Police.
Ginklaro sini nga wala na sang ikaduha nga hugna sang amo nga ayuda para sa probinsiya sang Capiz kag ang mga wala nakabaton nga kwalipikado nga benepisyaryo na lamang ang makabaton sang cash grant.
Ang nagtumod sa mga left-outs suno sa opisyal amo ang mga LGU’s nga nagsumiter sa ila sang listahan sang mga benepisyaryo.
Una na nga nakapanghatag ang talatapan sang amo nga ayuda sa mga banwa sang Sigma, Maayon, Dumalag, Tapaz, Panay kag Panitan.
Nagapadayon naman karon ang distribusyon sa mga banwa sang Ivisan kag Pilar.
Para naman sa mga kabanwahanan nga wala pa ma-releasan, igahatag ini sa ila pinaagi sa pagcontact sa ila kag paghulog sa mga money remittances.
Ginalauman sang talatapan nga matapos ang paghatag sang amo nga cash grant sa mga left-outs sa Capiz subong nga bulan sang Hulyo.
