Nagpaathag karon ang focal person for elderly sang DSWD Region 6 sa status sang social pension sang mga benepisyaryo nga mga senior citizen sa probinsiya sang Capiz.
Ginpahayag ni Ms. Mareicar Labinghisa may lima na lamang ka mga banwa sa Capiz ang wala pa nakapay-out sa 2nd quarter sang social pension sang mga benepisyaryo.
Apang sa lima ka mga banwa, nakapatigayon sang pay-out kahapon ang banwa sang Dao kag Pilar, samtang ginschedule ang pay-out sa nabilin nga tatlo ka mga banwa nga ginalakipan sang Pontevedra, Dumalag kag Dumarao sa Oktubre 18 kag 19, 2021.
Suno kay Labinghisa nga ila ginatinguhaan nga maka-pay out ang tanan nga banwa agud mabaton na sang mga katigulangan ang ayuda sang gobyerno.
Ginpahayag pa sang opisyal ang nakabaton sang pay out ang una nga nakasumiter sang mga papeles sa talatapan.
Ginkumpirma man sini nga nagapakig-angut sila sa mga Local Government Units antes patigayunon ang releasing sang social pension bangud ang mga LGUs ang naga-provide sang venue sang pay-out.
Gintadlong man ni Labinghisa ang report nga indi makabaton sang ila social pension ang mga katigulangan nga wala makapabakuna.
Suno diri nga wala ini sang kamatuoran kag pagpatalang lamang ini nga report.
Apang ginpalab-ot sang opisyal sa mga senior citizens nga indi kwalipikado sa social pension ang mga katigulangan nga SSS ukon GSIS pensioner.
Gin-athag sini ang makabig nga qualified beneficiaries sang programa ang mga indigents nga mga senior citizen.
Samtang nahibaluan nga may yara sang 54mil 953 ka benepisyaryo ang nasambit nga programa sa probinsiya sang Capiz.
