ROXAS CITY – Ginkompirmar sang Municipal Health Officer sang banwa sang Pilar nga si Dr. Lora Castillo nga residente sang banwa sang Pilar ang isa ka Locally-Stranded Individual (LSI) nga dugang nga nag-positibo sa coronavirus disease (COVID-19) sa Capiz.
Ini matapos nga una nga nagguwa sa datos sang Capiz Provincial Health Office (PHO) nga residente ini sang Roxas City.
Suno kay Castillo, ini ang naga-edad sang 29 anyos nga lalaki kag may travel history sa Muntinlupa City, Metro Manila.
Nag-abot ini sa probinsiya sadtong Agosto 3 sakay sa Kabalaka sweeper flight kag nagguwa nga positibo ini sa amo nga balatian sadtong Agosto 11.
Ginklaro man sini nga wala nakapauli sa ila balay ang amo nga persona bangud gilayon ini nga gindala sa barangay quarantine facility.
Ginakabig nga ‘asymptomatic’ ang nasambit nga persona ukon wala nakitaan sang anuman nga sintomas nga natalana nga dal-on sa Kabalaka Isolation Facility.
