Ginsuportahan ni Bicol Saro Party-list Representative Brian Raymund Yamsuan ang hinyo sang Bureau of Jail Management and Penology (BJMP) nga madugangan ang food and medical allowance para sa mga persons deprived of liberty (PDLs) nga nakalakip sa proposed 2025 national budget.
Sa budget hearing nga ginpangunahan sang House Committee on Appropriations ang ginatudlo ni Yamsuan nga indi bastante sa karon ang P70 nga budget para sa pagkaon sang mga preso kag ang P15 per day nga budget sa kinahanglanon sini nga bulong.
Ini ang pahayag ni Yamsuan sang ginhinyo ni BJMP Jail Director Ruel Rivera nga itaas sa P100 ang food allowance sang mga PDLs kag itaas man sa P30 ang medicine allowance sang mga ini.
Suno kay Yamsuan, ang nasambit nga apela sang BJMP ang suportado man sang Commission on Human Rights (CHR) sa tuyo nga masiguro ang makatawo nga sitwasyon sa mga presohan sa bilog nga pungsod nga sa karon overpopulated na.
Una na nga gin-file ni Yamsuan ang House Bill 8672 nga ang tuyo nga ipahamtang sa isa ka departamento ang BJMP amo man ang correctional and jail services sang mga provincial governments, kalakip man ang Bureau of Corrections (BuCor), Board of Pardons and Parole, kag ang Parole and Probation Administration.
