ROXAS CITY, CAPIZ- Liwat naman nga patigayunon ang Dugong Bombo: A little pain, a life to gain sa Nobyembre 15 kaupod ang Bombo Radyo Philippines Foundation Inc. kag ang Philippine Red Cross.
Sa interview sang Bombo Radyo kay Raymundo Martinez, Administrator sang Philippine Red Cross Capiz chapter, iya ginpahayag nga ang nasambit nga bloodletting activity ang daku nga bulig sa mga tawo nga nagakinahanglan sang dugo agud masugpunan ang ila nga kabuhi.
Ginpakigbahin ni Martinez ang pila ka butang nga dapat tandaan sang isa ka donor antes mag-donate sang dugo.
Una, kinahangalan nga healthy kag wala sang balatian bangud may ginahimo nga physical screening agud mahibaluan kun qualified mag-donate sang dugo ang isa ka tawo.
Suno kay Martinez, kinahanglan naga edad sang 18-anyos tubtob 60-anyos ang blood donor apang sa mga naga-edad sang 16-17 anyos kag luag nga magdonar sang dugo, kinahanglan nga may pahanugot halin sa ginikanan.
Ginadumilian naman nga magdonar sang dugo ang mga indibidwal nga naga-edad sang manubo sa 16-anyos, manubo sa 50 kilos ang bug-at, may yara sang high blood pressure, anemia ukon iban pa nga mga medical condition, may yara sang hepatitis, tuberculosis, HIV/AIDS, kanser, pag-inom sang antibiotics ukon pila ka mga bulong sa nagligad nga pito tubtob 14 ka adlaw, may tattoo ukon body piercing sa sulod sang tinalikdan nga 12 ka bulan, nag-inom sang makahulubog nga ilimnon ukon nagagamit sang droga, kag ang nagabusong ukon bag-o lang bun-ag.
Pahayag pa niya, target nga makalab-ot sa 300 ukon masobra pa nga mga blood donors ang nasambit nga aktibidad.
Gina-imbitar sang Bombo Radyo Philippines kag sang Philippine Red Cross ang publiko indi lang mga regular donors kundi mangin ang mga first time donor nga makigbahin sa Nobyembre 15 sa Dugong Bombo: A little pain, a life to gain nga hiwaton sa Capiz State University Main Campus.
Interviewed by Bombo Roadnie Daban Dalanon
