ROXAS CITY – Pilas ang naangkon sang tatlo tanan ka mga persona, matapos nga aksidente nga nagbungguanay ang duha ka motorsiklo sa provincial road sa Barangay Maindang, Cuartero, Capiz.
Ginkilala ang biktima nga si alyas Tinay, yara sa legal nga pang-edaron, samtang ang ginapahayag driver suspek amu ang duwa ka menor de edad nga sanday alyas Martin kag alyas Vince kag lunsay residente man sang nasambit nga lugar.
Sandig sa nakuha nga impormasyon nagikan sa Cuartero Municipal Police Station, ginapahayag nga ginamaneho sang biktima ang isa ka RACAL (TS125) nga motorsiklo, samtang ang ginapahayag driver suspek nga duwa ka menor de edad, ginamaneho ang Honda click 125 nga motorsiklo nagaduag itom, kun sa diin head-on collision ang natabo sandig man sa imbestigasyon sang kapulisan sa lugar.
Gilayon naman nga ginrespondehan sang katapo sang kapulisan ang lugar kag ginpadangat ang biktima sa Dao District Hospital, samtang ang duwa ka menor de edad ang gin padangat naman sa Roxas Memorial Provincial Hospital para sa nagakaigo nga pagbulong.
Samtang, ginkustodiya sang Cuartero PNP ang imbolbado nga mga motorsiklo para sa nagakaigo nga disposisyon.
Sa karon, nagapadayon pa ang imbestigasyon sang katapo sang kapulisan sang Cuartero Municipal Police Station angut sa nasambit nga insidente.
