DUMARAO, CAPIZ – Ginlay-off na sa serbisyo ang duha ka traffic enforcer nga nag-isyu sang sala nga citation ticket sa banwa sang Dumarao, Capiz.
Sa interview sang Bombo Radyo kay Dumarao Mayor Atty. Mateo Hachuela, iya ginpahayag nga naham-ot ini sang una nga ginpalab-ot sa iya ang amo nga insidente kg gilayon nga ginpatawag sa iya opisina ang nasambit nga mga enforcer.
Sa panaysayon sang duha ka enforcer, nag-counterflow ang amo nga tricycle gani ginpapundo ini kag ginpangitaan sang mga dokumento.
Sang wala ini may mapakita nga ID kag Drivers license, nagpresentar ang asawa sang driver nga ang iya nga ID na lang ang gamiton kag amo man ang ginsulat sa citation ticket.
Suno kay Mayor Hachuela, nakabatyag man ini sang kaluoy sa mga enforcer apang bangud sa ila nga kapaltahan sa ubra, kinahanglan gid nga i-lay off ang mga ini.
Pahayag pa niya, igapatawag man sang mga katapo sang kapulisan ang driver nga gin-isyuhan sang ticket agud i-tsekyar kun bala kumpleto ini sa mga nagakaigo nga dokumento.
Nagpanawagan man ang natungdan sa publiko nga magsunod sa layi sang trapiko agud indi na maliwat ang kasubong nga insidente.
INTERVIEWED BY: BOMBO ROADNIE DABAN DALANON
