KALIBO, AKLAN – Patay na antes makalab-ot sa Bugasong Medicare Hospital ang duha ka mga estudyante samtang pilason naman ang siyam ka iban pa lakip na ang driver sang L300 van matapos ini ang nagbaliskad kag nag-arado sa kudal sang isa ka balay sa kilid sang national highway sa idalum sang Barangay Cadajug sa banwa sang Laua-an, Antique.
Ang biktima amo sanday Geiril Farajillo Templora, 21-anyos, residente sang Barangay Guinsang-an, Hamtic kag Kristinelle Granada Estandarte, 20-anyos, residente sang District 1, Sibalom, Antique.
Sa exclusive interview sang Bombo Radyo kay Police Executive Master Sergeant Jeanith Garcesa, deputy chief of police sang Laua-an Municipal Police Station, yara sa banwa sang Culasi ang van nga sakay sang mga estudyante gikan sa University of Antique main campus sa diin sila ang nagpasundayag sang saot para sa Youth Week.
Pag-abot sa lugar, nag-overtake ang isa pa ka van nga nagasunod sa ila. Sa baylo nga mabungguan ang likod nga bahin sang salakyan, ginliso sang driver nga si Soriano Almonte, 57-anyos kag residente sang Barangay San Francisco Sur, Tibiao, Antique ang manibela rason sang aksidente.
Wala na nakalab-ot sa ospital ang duha ka mga estudyante nga nag-angkon sang patal nga pilas sa nagkalain-lain nga bahin sang ila lawas, samtang ang iban pa nga napilasan ang padayon pa nga ginabulong sa separado nga mga ospital sa probinsya sang Antique.
Sa karon padayon ang imbestigasyon sang kapulisan sa nasambit nga insidente.
