ROXAS CITY -Wala nadakpan sa akto nga nagapatigayon sang iligal nga palumba-anay ang anum ka mga persona nga gin-impound ang mga motorsiklo matapos nga nakit-an ang presensya sa gin-alegar lugar nga ginapatigayunan sang iligal nga palumba-anay sa Barangay, Bato Roxas City.
Ini ang ginpahayag ni Police Lieutenant Colonel Ricardo Jomuad Jr. Hepe sang Roxas City Police Station sang mainterview sang Bombo Radyo.
Ginpahayag ni Jomuad nga nagapabilin sa kustodiya sang Roxas City Police Station ang duha sa anum ka mga motorsiklo matapos nga gin-impound sang mga kapulisan.
Gin-athag ni Jomuad nga wala ginsulod sa karsel ang anum ka mga nagkaladakpan bangud wala man sila nadakpan sa akto nga nagapatigayon sang palumba-anay.
Apang ginkompirmar ni Jomuad nga gin-issuehan sang citation ticket kag gin-impound ang ila mga tagsa ka mga motorsiklo matapos nga natukiban nga wala ini sang mga lisensya, wala sang mga side mirror ang mga motorsiklo kag iban pa.
Magluwas diri, may pila man ka mga indibidwal nga gindala sang mga kapulisan
sa Crisis Center matapos nga wala nagasuksuk sang facemask kag wala naga obserbar sang social distancing.
