ROXAS CITY -Ginreklamo sang isa ka Person’s with Disabilities si Dumalag Mayor Eriberto Castro Jr., sang banwa sang Dumalag matapos ginaalegar ang indi maayo nga ginhimo sang alkalde sa iya sang nagbisita ini sa isa ka namatyan sa Taft St., Barangay Poblacion sang nasambit nga banwa.
Sandig sa ginreklamo sa Dumalag Muncipal Police Station si Maria Victoria Salazar, 58 anyos sang nasambit nga lugar, ginaalegar nga nagbisita si Castro sa puluy-an sang iya tiya bilang pagpakita sang simpatiya kag pagrespeto sa nagtaliwan sini nga himata.
Apang sang tion nga magabiya na kuntani ang alkalde, hinali sini nga ginpalapitan sini si Salazar kag nag-tuad nga nahidlaw na ini sa tagareklamo.
Ginaalegar ni Salazar nga gin-tuyo sang alkalde nga kup-an ini apang nagpabalibad ini bilang paghalong sa COVID-19.
Gindugang pa ni Salazar nga wala nagpati ang nasambit nga alkalde kag liwat nga nagtuyo hakus sa iya apang liwat nya ini nga ginpamalibaran.
Apang wala sa guihapon nagpamati si Castro kun sa diin liwat sini nga gintuyo hakus si Salazar apang ginpunggan na ini sang iban sini nga mga himata.
Dugang pa sini nga yara sa impluwensya sang makahulubog nga ilimnon si Castro sang natabo ang insidente.
Suno sa tagreklamo nga nakabatyag ini sang “harrassment” sa ginhimo sang alkalde kag wala natulogan sa natabo.
Nakabatyag naman ini sang kahadlok bangud sa posible masunod nga matabo matapos ginbalibaran sini ang alkalde.
Ginpakamayo sang tagreklamo nga ipabalhag sa pulisya ang nasambit nga insidente.
Sa karon wala pa nakapadulong sa mga kapulisan si Mayor Castro agud sabton ang nasambit nga alegasyon.
