ROXAS CITY-Indi pa maestablisar sang Dumalag Municipal Police Station kun sino ang tuyo nga patyon sang mga suspetsado sa pag-salvage sang duha ka mga persona sa banwa sang Dumalag ka Dumarao, Capiz.
Ini ang ginpahayag ni Police Captain Leomendo Tayupon, Chief of Police sang Dumalag Municipal Police Station sang mainterview sang Bombo Radyo.
Ginpahayag ni Tayupon nga indi pa maestablisar sang mga kapulisan kun sino sa kay Rose Bering kag Erlon Lego ang tuyo nga patyon sang mga suspetsado bangud madamo na sa karon nga nagaguha nga anggulo nga ginasundan sang mga kapulisan natuhoy sa kamatayon sang biktima.
Suno sa kay Tayupon nga makig-angut ini sila sa Dumarao Municipal Police Station agud makumpirmar kun kilalahay ang duha ka mga biktima.
Gindugang pa sang opisyal nga indi pa matul-id kun nadalahig lang sa krimen si Bering sandig sa alegasyon sang iya mga himata sini.
Samtang padayon man ang pagkig-angut sang Dumalag Municipal Police Station sa Molo Police Station agud makompirmar kun may yara sang pending nga panombongon si Lego nga Frustrated Homicide sa nasambit nga lugar.
Matandaan basi sa nakuha nga impormasyon sang Bombo Radyo gikan sa iloy ni Erlon Lego nga nabilanggo ini sa Bureau Jail Management and Penology (BJMP) sa nasambit nga probinisya apang wala ini kahibalo kun ano nga panombongon.
Samtang padayon man nga ginakompirmar sang mga kapulisan nga may yara man sang ginaalegar ginakaulamiran nga insidente sang Robbery kag Carnapping si Lego sa Pavia kag Passi, Iloilo.
