Sigma – Gintupok sang kalayo ang isa ka edipisyo nga may lima ka hulot kalakip na ang isa ka faculty room nga malapit sa Computer Laboratory sa Vicente Andaya Sr. National High School sa banwa sang Sigma, Capiz.
Base sa pagpangusisa sang hubon sang Bombo Radyo kay Mr. Reynaldo Crespo isa sa mga faculty teacher sang nasambit nga bulthuan, ginpahayag sini nga may isa ka residente nga nagbakal sang ice ang una nga nakakita nga nagaaso na ang nasambit nga pasilidad rason nga nagpangayo ini sang bulig sa mga residente sa lugar.
Ginpahayag ni Crespo nga suludlon nga porsyon sang buluthuan ang nasunog rason nga wala ini gilayon nadiparahan sang security.
Nagresponde sa sunog ang mga katapu sang Bureau of Fire Protection sang Ivisan, Mambusao kag Sigma sa diin naglab-ot sa 30 tubtob 45 minutos antes napalong ang sunog.
Ginapatihan ni Crespo nga posible naggikan ang sunog sa wiring sa isa ka hulot malapit sa computer laboratory.
Kalakip sa mga nasunog ang mga flat screen television, cabinet, kag iban pa nga mga kagamitan sang mga manunudlo kag estudyante.
Nahibaluan nga human sa concrete materials ang nasunog nga edipisyo.
Samtang gilayon nga nagpadulong sa eskwelahan ang mga manunudlo agud salbaron ang ila mga kagamitan kag importante nga mga dokumento sa amo nga hulot.
Samtang, ginpalab-ot ni Crespo sa mga ginikanan kag estudyante nga indi suspendido ang klase sa buluthuan, bangud may iban pa sila nga hulot klasehan nga sarang magamit sa ila pagpatigayon sang klase.
Nagpangabay lamang ini sa mga ginikanan nga magbuligay sila sa pagpaninlo.
Padayon sa karon ang imbestigasyon sang mga arson investigators sa nagluntad nga sunog agud matumod kun diin naghalin ang kalayo.
