Nag-apelar ang Philippine Embassy sa Israel sa tanan nga mga Pilipino nga magpabilin sa sulod sang balay kag magsunod sa security guidelines, matapos ginpaidalum sang Israel Defense Forces (IDF) ang pungsod sa essential activity status bangud sa nagapadayon nga tensyon sa tunga sang Israel kag Iran.
Sa idalom sang status, ang mga klase sa tanan nga eskwelahan ginkanselar; ginadumilian man ang pagtililipon kag ang yara lang sa essential services ang pwede makatrabaho.
Nagpanugyan man ang Embahada sa mga Pilipino nga maghanda sa pagdalagan sa mga shelter, safe rooms, ukon evacuation areas sa tion nga may missile alert.
Ang ini nga mando epektibo halin Hunyo 22 kahapon nga adlaw sa alas 3 sang aga tubtob subong nga adlaw, Hunyo 23 alas 8 sang aga.
Base sa datus sang Department of Foreign Affairs (DFA), 223 ka mga Pinoy sa Israel ang naghingyo sang repatriation sa diin 26 diri ang ginalauman nga mapauli sa masunod nga mga inadlaw.
Isa ang yara sa kritikal nga kondisyon samtang pito naman ang nakaguwa na sa ospital. Naglab-ot sa 88 ka mga puluy-an sang mga Pinoy ang nahalitan bangud sang airstrikes, kag 80 diri ang gin-evacuate na sa mas luwas nga mga lugar.
Ginpataas man sang gobyerno sang Pilipinas ang status sang Israel kag Iran sa Crisis Alert Level 3, kag gina-engganyo ang mga Pinoy didto nga mag-avail sang boluntaryo nga repatriation.
Sarang nga makontak ang Embahada sa ila hotline number +972 54-4666118.
