Personal nga nagpadulong sa istasyon sang Bombo Radyo Roxas ang wala na ginhingadlan nga estudyante sang isa ka buluthoan sa Fuentes Drive sining syudad nga ginpalab-ot ang reklamo nahanungod sa ila nga Departmental Shirt nga September 2023 pa nagpanukot apang tubtob subong wala pa ma-release.
Suno kay alyas “Beto”, 3rd year College student sang amu nga buluthuan, ginpahayag nga nagapabilin nga kwestyonable para sa ila nga mga estudyante kun sa diin na ang ginbayaran nga Department shirt.
Ginapangitaan na suno sila sang ila tagsa ka mga ginikanan kun sa diin na ang tshirt nga ila ginbayaran sadto pang nakaligad nga tuig.
Pahayag pa sang tagreklamo nga ginapanawagan sini ang ila nga Former Governor sang ila Departmento agud ma-eksplekar sa ila kun sa diin nagkadto ang kwarta nga ila ginbayad kag kun sa diin na ang tshirt nga ila ginkasugtan.
Para sa Former Governor nga ginareklamo, bukas ang istasyon sang Bombo Radyo Roxas, agud nga sabton ang alegasyon batuk sa imo nga personal nga ginpalab-ot diri.
