ROXAS CITY – Natalana nga pasakaan sang panumbungon nga paglapas sa RA 9165 ukon Comprehensive Dangerous Drugs Act of 2002 ang isa ka 57-anyos nga ex-convict matapos nadakpan sa ginkasa nga drug buybust operation sang gintingub nga puwersa sang mga katapo sang Station Drug Enforcement Team (SDET) sang Roxas City PNP kag Provincial Drug Enforcement Agency ukon PDEA sa Purok 1, Barangay Libas, Roxas City.
Ginkilala ang drug suspect nga si Joey Anonoy, 57-anyos sang nasambit nga lugar.
Suno kay Police Master Sergeant Ramil Arcangeles, tagpamaba sang Roxas City Police Station nga madugay na nila ginamonitor ang iligal nga akbidad sang nasambit nga drug suspect.
Ginpahayag ni Arcangeles nga antes ini madakpan sang mga kapulisan, nakabaligya pa ini kag nakagamit sang iligal nga droga.
Nahibaluan nga nadakpan man ini sadtong tuig 2004 apang nakahilway ini sang 2005 matapos nga na-dismissed ang iya kaso.
Narekober sa posession ni Anonoy ang apat ka sachets sang ginapatihan nga shabu nga may estimated value nga P39,000; P500 nga buybust money kag isa ka unit sang cellphone.
Sa karon, padayon na nga ginahibalo sang mga otoridad ang mga indibidwal nga konektado kay Anonoy.
Samtang, nakahunong na sa karsel sang Roxas City Police Station ang nasambit nga drug suspect.///END
