Ginakampaniya ni anay US President Barack Obama si Vice President Kamala Harris sa campaign rally sa Pittsburgh sa swing state sang Pennsylvania sining gab-i sang Huwebes, oras sa Amerika.
Sa speech ni anay US Pres. Obama sa University of Pittsburgh, nag-apela siya sa pumuluyo sang Amerika nga magboto para kay Vice President Kamala Harris bilang Presidente sa palaabuton nga piniliay sa Nobiyembre 5, 2024.
Ginpaandaman man ni Obama ang kasumpong sa US Presidential race ni VP Harris nga si Republican candidate kag ex-US President Donald Trump kaangut sa nagkalain-alin nga mga isyu kalakip na diri ang mga kabutigan ni Trump batuk sa pagpanghatag sang ayuda sang Biden administration sa hurricane victims.
Ginbatikos man ni Obama si Trump bilang isa ka selfish nga pulitiko nga ang ginpanumdom amo ang iya nga ego, kwarta kag iya nga estado.
Wala man suno sini ginpanumdom ang pumuluyo sang Amerika kag gina-akusahan man si Trump nga ginbalaik sini nga buwagon ang Affordable Care Act, isa ka importante nga legislation kun sa diin nakadependa ang milyun-milyon nga mga Americans.
