CAPIZ – Liwat nga ginpahanumdum sang Presider & Homilist sang Archdioceses sang Capiz ang pista sang tatlo ka hari ukon mas bantog sa tawag nga “Feast of the Three Kings”.
Sa interview sang Bombo Radyo kay Rev. Fr. Mark Q. Granflor, ginpahayag sini nga ang Feast of the Three Kings, kilala bilang Epiphany ukon Theophany kung sa diin isa ka selebrasyon sa Kristiyanismo nga ginadumdum sa una nga Domingo sang tuig.
Ginaselebrar man sang mga kristiyano ang Epiphany bilang pagdumdum sa pagbisita sang Three Wise Men ukon Three Kings kay Hesus, dala ang mga regalo kag pahayag sang pagdayaw sa lapsag nga si Hesus.
Suno kay Rev. Fr. Granflor, ini man ang katapusan nga adlaw sang Christmas season para sa pila ka mga Western Christian churches.
Mahibaluan nga ang Three Kings, ginkilala sa mga kristiyano nga tradisyon kag istorya bilang sanday Melchior, Gaspar kag Balthazar.
Si Melchior, nga nagikan sa Persia, kag ginlaragway nga tigulang kag may dala nga bulawan (gold), simbolo sang status ni Hesus bilang hari.
Si Gaspar, nga nagikan sa India, ginlaragway bilang isa ka bata nga lalaki kag nagdala sang olibano (frankincense), nga nagasimbolo pagiging anak sang Diyos ni Hesus.
Kag si Balthazar naman nga nagikan sa Arabia, masami nga ginalaragway bilang nagdala sang mira (myrrh), nga nagsimbolo sa pag-antos kag kamatayon ni Hesus.
Ang mga regalo nga dala sang Tatlo ka Hari, indi lamang basta mga dulot, kundi mga simbolo sang importante nga aspeto sang kabuhi kag misyon ni Hesus sa duta.
Ang bulawan (gold), isa ka importante kag magarbo nga metal nga nagasimbolo sa pagiging hari ni Hesus. Ini ang nagapangahop sang iya status bilang “King of the Jews” kag ang iya daku nga gahum kag dunggog.
Ang olibano (frankincense), isa ka sahi sang aromatic resin nga ginagamit sa mga religious rituals, nagasimbolo sa balaan nga Hesus kag ang iya pagiging Anak sang Diyos.
Ang mira (myrrh), nga ginagamit sadtong una nga panahon para sa pagbalsamar kag bilang pampahid sa mga pilas kung sa diin nagasimbolo sa pagkabudlay kag kamatayon ni Hesus.
Mensahe ni Rev. Fr. Granflor nga indi pagkalimtan sang tanan nga may yara sang bituon nga nagahatag sang kasanag sa tagsa ka mga pagtilaw nga naga-abot sa kabuhi.
