ROXAS CITY – Ginalauman nga pagadugukan sang madamo nga mga tawo ang patigayunon nga ‘Food Trip sa Capiz’ sa Abril 12, subong nga tuig, Biyernes nga adlaw sa Capiz Gymnasium, Villareal Stadium bilang kabahin sang aktibidad kadungan sang selebrasyon sang Capiztahan 2019.
Suno kay Atty. Emily Depon, head sang Food Trip sa Capiz, all-set na ang tanan para sa nasambit nga aktibidad kun sa diin lauman ang binukid-bukid nga mga alimango, kasag, pasayan, lukon kag madamo nga iban pa nga bugal sang probinsiya bilang Seafood Capital of the Philippines.
Mangin prayoridad sang probinsiya ang pila ka mga dumuluong kag dinapit nga bisita nga magaabot kag magaupod sa amo nga selebrasyon.
May kapin 2, 000 ka mga tickets suno kay Depon nga ginpanagtag kun sa diin ila ipatuman ang No Ticket, No Entry policy.
Apang sa mga magaabot nga wala sang ticket suno kay Depon, may mga ginhanda man sa guha sang Gymnasium nga kapareho nga mga pagkaon sa sulod.
Magluwas sa manamit nga mga seafoods, may tagsa ka mga special cuisines man ang mga kabanwahanan sa bilog nga probinsiya.
Ang nasambit nga aktibidad ang isa ka pamaagi agud mapakilala ang Capiz sa mga dumuluong kag mapasanyog pa ang turismo sang probinsiya.
