ROXAS CITY – Natalana nga iturn-over sa korte subong nga adlaw ang ginbansagan nga Forex Investment Scam Queen nga si Lourdes Bulaquina Baarde, residente sang Rio Grande Subdivision, Brgy. Baybay sining syudad kag kaupod sini nga si Joel Domayan sang South Triangel, Quezon City matapos madinalag-on nga nadala ang mga ini sa syudad sang Roxas sang mga katapo sang kapulisan sang tinalikdan nga adlaw sang biyernes, Nobyembre 14.
Matandaan nga una na nga naaresto ang 42-anyos nga si Baarde sang mga katapo sang National Bureau of Investigation (NBI) Manila samtang nadakpan man si Domayan sang mga katapo sang Quezon City Police District kag sining karun lang natugyan sa mga katapo sang Roxas City PNP.
Wala sang ginrekomendar nga piyansa si Judge Kristine Tianco- Vinculado sang Regional Trial Court branch 16 sining syudad sa ginpapanaog sini nga warrant of arrest sa kaso nga syndicated estafa batuk sa duha ka mga arestado nga napetsahan sang Agosto 28 sini nga tuig.
Samtang yara ang mga ini sa karsel sang Roxas City PNP, ginserbi kay Domayan ang duha pa sini ka standing warrants of arrest sa kapareho nga kaso nga napetsahan sang Agosto 19 nga ginpapanaog ni Judge Esperanza Isabel Deslate sang Branch 19.
13 man ka dugang nga warrants of arrest sa kaso nga Estafa ang ginserbi dugang kay Baarde kag nagalab-ot sa tag 12mil pesos ang piyansa sa kada warrants of arrest sini.
Sa pihak nga bahin, padayon nga nagalaum ang mga investors sa Forex investment scam nga mabalik pa ang ila gin-invest nga kwarta kabaylo sang ila nga pag-withdraw sa ginpasaka nga panumbungon sang mga ini batuk kay Baarde kag Domayan kag sa iban pa nila nga mga kaupdanan.
