ROXAS CITY, CAPIZ – Pabor si anay Iloilo 5th District Representative kag sa karon Board Member nga si Atty. Rolex Suplico sa panawagan ni Bacolod Rep. Albee Benitez nga mag-leave of absence si Department of Public Works and Highways (DPWH) Secretary Manuel Bonoan samtang ginapatigayon ang audit sa ahensiya.
Sa interview sang Bombo Radyo Roxas, ginpahayag ni Suplico nga nagakakadapat ang panawagan ni Benitez agud masiguro nga hilway kag patas ang proseso sang imbestigasyon sa DPWH.
Suno kay Suplico, bilang isa ka anay mamalidha, naintindihan niya ang importansiya sang delicadeza sa mga kasubong nga sitwasyon ilabi na kun may malapad nga imbestigasyon nga ginapatuman sang Presidente.
Nagapati si Suplico nga ang pag-leave ni Sec. Bonoan isa ka positibo nga tikang agud mapakita ang transparency kag integridad sa panahon sang imbestigasyon.
Samtang, gindayaw man ni Suplico si President Ferdinand Marcos, Jr. bangud sa pagbuyagyag sini nga may mga kongresista nga nagaserbe nga contractor sa mga proyekto nga yara sa idalom sang DPWH.
– Interviewed by: Bombo Daren Salomeo Henson
